O candidato de AGE Jon Sáez
García brutalmente agredido pola policía cando asístía á manifestación
estudantil de Ourense
Este mediodía, o compañeiro nº4 da candidatura de Ourense, Jon Sáez García,
estudante do último curso de Ciencias Políticas e membro de EU, asistía con
centos de estudantes, a maioría menores de idade, á manifestación convocada
polos sindicatos estudantís contra os recortes no ensino.
Cando se atopaban diante da biblioteca pública de Ourense, na R/Concello,
un grupo de policías comezaron a mallar indiscriminadamente en varias persoas,
menores incluídos. A peor parte levouna o noso compañeiro Jon que recibiu
golpes en pernas, brazos, no pulso e nun ollo, e sendo esposado coma se fora un
criminal. Inmediatamente foi trasladado ás urxencias para ser atendido das
diversas contusións que ten por todo o corpo.
Despois de solicitar o correspondente parte de lesións, o noso compañeiro
atópase na asesoría xurídica para apresentar a correspondente denuncia de
agresións e tomar as medidas que consideremos necesarias para a correspondente
asunción de responsabilidades.
Desde AGE amosamos o noso apoio e solidariedade co compañeiro que foi
agredido brutalmente só por exercer o seu dereito de manifestación de xeito
pacífico, como así o estaban a facer centos de rapaces e rapazas, a maioría
menores de idade, que protestaban
pacíficamente contra os recortes no ensino público e pola defensa dun ensino
gratuíto, público e universal. Do mesmo xeito, denunciamos públicamente estes
feitos máis propios do fascismo e de momentos históricos que as rapazas e
rapaces que se manifestaban non coñeceron nunca. Anunciamos tamén, que AGE atópase neste
momento apresentando a correspondente denuncia, e esiximos a inmediata dimisión
do subdelegado do goberno en Ourense, así como das/os responsables do PP ante
feitos desta gravidade.
Alternativa Galega de Esquerda-Ourense
Nenhum comentário:
Postar um comentário