El Bloque por Asturies quier güei 21 de febreru, coincidiendo col Día de la llingua materna declaráu nel añu 1999 pola UNESCO denunciar, que por tercera Vez rechazóse na Xunta de Portavoces la propuesta pa que se discuta la creación de la Especialidá de Llingua Asturiana nesti Parlamentu. Esta ye otra demostración más del pactu que tienen amagostao’l Partido Popular, el PSOE y izquierda Unida-Los Verdes pa nun discutir nesta cámara d’ello, precisamente onde ta representada la soberanía popular de los asturianos y les asturianes.
El tema de la Especialidá de Llingua Asturiana ye un puntu del pactu de gobiernu que se firmó nel 2009 y que visto lo visto’l PSOE y Izquierda Unida nun quieren cumplir cola ayuda cómpliz y fiel del Partido Popular cuando se trata d’atacar a la llingua asturiana.
El Bloque por Asturies insta al conseyu de gobiernu, a que d’una vez por toes se normalice la situación na enseñanza de la llingua asturiana. Tenemos porcentaxes altísimos d’estudiantes n’educación primaria, secundaria y bachilleratu ,a pesar de tolos inconvenientes, un exemplu son les ratios que vulneren el principiu de voluntariedá que dicta la Llei d’Usu y l’Estatutu d’Autonomía y de la qu’hai una sentencia reciente que’l Gobiernu se niega a acatar. Más de 20.000 escolinos y casi doscientos profesores qu’imparten la materia viven nuna situación d’anormaliá.
Tenemos titulaciones na universidá y ye’l momentu yá de normalizar, resolver, dar estabilidá y equiparar a tolos maestros n’igualdá de derechos y pa eso la única manera ye crear la especialidá de profesor de llingua asturiana.
El gobiernu del Principado miente a sabiendes y de mala fe con esti tema. Nun ye la primer vez que fala de supuestos informes que tán falseaos como yá denunció’l Bloque por Asturies hai meses. La disculpa siempre cambia con tal de nun reconocer los derechos d’unos profesionales como son los maestros de Llingua Asturiana, que por cierto y que naide lo olvide, pa selo primero tienen que tar diplomaos o llicenciaos nuna especilidá igual que cualquier profesor o profesora y depués siguir estudiando dos cursos na Universidá p’algamar la segunda titulación de Espertu o Especialista en Llingua Asturiana. Ye mentira que pa crear la Espeicialidá de Llingua Asturiana l‘idioma tenga que ser oficial como se diz munches veces, igual que ye mentira que sea’l Ministeriu español d’Educación quien ponga problema pa la creación.
La prueba definitiva ye que’l vienres día 4 d’esti mes de febreru nuna reunión nel Ministeriu d’Educación en Madrid tratóse’l tema de la Especialidá d’Asturianu nuna mesa de negociación sectorial onde se trataba’l proyectu de Real Decretu d’Especialidaes de Maestros.
En concreto los representantes de la confederación intersindical STEs a propuesta del sindicatu mayoritariu de la enseñanza n’Asturies SUATEA, presentó la redacción siguiente del artículu que voi lleer:
Tendrán la consideración de especialidades del Cuerpo de Maestros, las de la lengua o lenguas cooficiales en aquellas Comunidades Autónomas que así lo tuvieran regulado y aquellas lenguas propias de las comunidades autónomas que, no teniendo estatus de cooficial, gocen de distintos niveles de protección en su legislación autonómica y soliciten su reconocimiento como especialidad docente.
La respuesta del representante del Ministeriu d’Educación Miguel Soler García foi que’l Ministeriu preguntó al Gobiernu del Principado pola propuesta que ficiera’l sindicatu SUATEA pa crear la especialidá de llingua asturiana y la respuesta de los representantes del Gobiernu Asturianu foi negar l’interés en crear la especialidá.
Esto ye otra falta de respetu más del gobiernu asturianu que ta mareando y mintiendo col tema de la Especialidá de Llingua Asturiana pa nun cumplir con puntu importante del pactu de gobiernu.
Na situación de crisis que tamos viviendo, el Conseyeru d’Educación Herminio Sastre anuncia que nun van convocase oposiciones y prefier siguir apostando pol modelu de precarización condenando a miles de maestros y maestres a la interinidá perpetua, al paru o a la emigración como pasa agora. Esti gobiernu sigue faciendo burlla d’un colectivu discrimináu históricamente y que nun va poder tener los mesmos derechos p’ acceder a un puestu de trabayu con normalidá vía oposiciones y concursu de tresllaos.
El Bloque por Asturies va pidir la comparecencia del Conseyeru d’Educación Herminio Sastre pa que dea la cara y nun s’escuenda tres la mentira. Nin los escolinos nin los maestros tienen que siguir aguantando un minutu más los caprichos y les obsesiones d’unos políticos que son parte del pasáu.
Roberto Colunga Fernández, 21 de febreru de 2011. Audio d'a intervención disponible equí.
Nenhum comentário:
Postar um comentário