A túa pensión será tan flexíbel como teu traballo

Isaac Rosa. Artigo tirado de aquí.

 El gobierno ofrece una jubilación con flexibilidad, alargar la edad hasta los 67 años pero incrementar la flexibilidad -Elena Salgado, vicepresidenta económica do Goberno-.

Son eu o único que se bota a tremer cando ouve falar de "flexibilidade" no debate sobre a reforma de pensións? Ninguén máis se asusta? Porque a min ler na mesma frase pensións e flexibilidade dáme case máis medo que os temidos 67 anos. De feito, empezo a sospeitar se ese 67 non será un macguffin que ao final até desapareza da escena, pero que entre tanto conseguiu levarnos ao morteiro da reforma.

Volvo ao da flexibilidade, porque é a palabra de moda entre os negociadores. Poucos eufemismos tan danosos hai na xerga economicista como ese. Se o seu xefe dilles que está a pensar introducir máis flexibilidade, vostedes xa saben de que está a falar, e bótanse a tremer ou se pon de uñas. Se o presidente da patronal pide eliminar rixideces, enténdeselle todo. E se o ministro do ramo promete unha reforma para ser máis flexíbeis, imos preparando a faixa.

Levamos anos ouvindo falar de flexibilidade aplicada ao mundo do traballo: contratos flexíbeis, despedimento flexíbel, xornada flexíbel, modos de produción flexíbeis, flexibilidade salarial... No tema laboral xa non nos enganan, xa sabemos de que falan. Por que a flexibilidade aplicada ás pensións ía ser diferente?

Chámenme a cisa, mais témome o pior: que a deterioración laboral en que resultou todo ese discurso sobre a bendita flexibilidade se traslade tamén ao ámbito da xubilación e acabemos tendo (máis do que xa temos) xubilados precarios e pensións-lixo igual que temos traballadores precarios e contratos-lixo.

Porque o argumentario xa mo coñezo: co tema laboral, a flexibilidade era unha promesa de felicidade para os traballadores, que teriamos máis autonomía, máis facilidades para a conciliación familiar, e pagaríasenos o que de verdade valemos. Pois o mesmo coas pensións: asegurarannos que coa flexibilidade cada un poderá facerse o seu retiro a medida, que se xubilará cando queira e terá incentivos para mellorar a súa pensión. E na prática comprobaremos de novo o que significa ser flexíbel: poder dobrarte sen chegar a romperte.