Resulta conmovedora e moi fermosa a fotografía na que Stéphane Hessel e José Luis Sampedro se saúdan colléndose fraternalmente das dúas mans.
Ambos, o diplomático e escritor francés e o economista e escritor español, naceron no ano 1917 e teñen pois 94 anos. E na fotografía, realizada por Uly Martín, os dous vellos intelectuais comprometidos co progreso humano e social manifestan a través do seu sorriso e da súa ledicia -acaban de se atopar en Madrid no acto de presentación do libro Indignádevos- unha irmandade profunda e unha solidariedade que se proxecta sobre nós e irremisibelmente nos afecta. José Luis Sampedro é o autor do limiar da edición española de Indignez vous!, un excepcional panfleto (opúsculo) político, no sentido máis nobre e transcendente do termo, que é un fenómeno editorial en Francia con máis de 1 millón de exemplares vendidos en pouco máis de tres meses.O Sampedro prologuista di que Indignádevos é "un grito, un toque de clarín que interrumpe el tráfico callejero y obliga a levantar la vista a los reunidos en la plaza". E Hessel, irmán de Sampedro no pensamento cívico e na activa esperanza revolucionaria, presenta o seu libro solicitando que exercitemos a nosa capacidade de indignación, a nosa capacidade de reacción fronte a un mundo que ten cada vez máis pobres, no que non se respectan os dereitos dos cidadáns e no que as garantías en temas de saúde, traballo e educación son cada vez menores. Hessel di que se caeu o Muro de Berlín tamén pode caer o sistema capitalista financeiro e Sampedro pide que a indignación, necesaria e urxente, se produza sen violencia, unha vía de insurrección pacífica semellante á que levaron a cabo figuras como Mandela, Martin Luther King ou o propio Gandhi, asasinado en 1948, o mesmo ano no que Sthéfane Hessel participaba na redacción da Declaración Universal dos Dereitos Humanos. Hessel e Sampedro xuntos, tal como os vemos na fotografía -dúas frontes lúcidas e a tensión feliz da irmandade- son unha lección inesquecíbel para todos.
Nenhum comentário:
Postar um comentário